Seite 130
Urkunden. 121
dhe we besegehelt hebben ghenomen under des capetels sente Blasies tho Brunswich inghesegele, als hir na volghet. Tho dem ersten: dat we den benomden broder Gheverde und sine brodere von eres orden weghene, de ok vorbenompt is, setten schün in de were des gudes tho Supplingeberch und dat dar tho hort unde anderswar, wor we eth hadden oder hebben, dat des orden von me Temple was, dat si ledech oder vorsath, und schün mit en dhe were besitten dhe wile we leven. Ok is ghedeghedinghet, dat we schün en twintich höve laten vor dem hove tho Supplingeberch umme alsolken tyns als men uns dar nu af ghiht, der hove moghen se angripen tho dem ersten als se ir bedvingen moghen. Ok schole we en an wischen, an weyde, an holte, an gharden und an bomgarden als vele bewiseń und laten, als se bedorven tho irer not, und de molen vor dem hove, als we se hadden, mit aller nüt und mit allem rechte. Ok schün de brodere und de orde stede halden, swat we an vorkopende umme wedercop oder an vorsettende des gudes tho Supplingeberch und dat dar tho horde oder anderswar, wūr we eth hadden, hebben ghedan, und schün dar nicht weder don sunder usen willen. Ok ne schole we sunder der brodere und des orden, noch se sunder usen willen, na disser thit nicht mer laten disses gudes, sunder hunderte mark moghe we soken an dem gude dat rede vorsath is tho usen schulden, und dar schün se uns tho vorderen und or breve op gheven of ment esghet. Ok schün de brodere und de orde mit gheystliker walt mit erer meysterscap in deme hove tho Rome und anderswar uns vorderen und vorstan alles des se moghen. Liker wis scole we en don swor wet vormoghen. Ok schün de brodere und de orde uns wandelen de brodere, de se setten in den hof tho Supplingeberch, icht se uns umbevelliсh weren. Ok is ghedeghedinget, of de Tempel orde weder ghesat worde, oder de paves dit gut anderswor ankerde, so were we aller deghedinghe mit en unvorbunden. Ok swat we des gudes, dat vorkoft is umme wedercop, vorsat, oder dar we anders recht to hebben, kunnen wederkrighen sunder ere helpe, dat scal use alleine sin dhe wile we levet. Swat we mit liker kost und arbeide mit den broderen und dem orden irwerven, dat scal half und half like wesen unser beydeŕ, swat aver de brodere und de orde mit usem willen sunderlike irwerven, dat scal ere sin alleine. Desser deghedinghe ghiht uns broder Ghevert breve mit sineme, des huses tho Brunswich und des huses to Goslere ingheseghelen beseghelet. An den selven worden scal he uns scheppen des meysteres broder Paules von Mutina, oder of he afghinghe, sines nakomelinghes breve und sines capitels, dat he erst halt in dessen landen. Ok swar we willen vor biscopeń, vor capeteln, vor herren und anderen guden luden, dar schün se bekennen desser deghedinghe und bidden mit uns und we mit en, dat men se uns wille bescriven under